إمتحان مادة بحب مصر جدا بس مصر بتحب واحد تانى

بمناسبة إمتحانات الثانوية العامة وإمتحانات الجامعات وموسم الإمتحانات بشكل عام
أقدم لكم اليوم إمتحان مادة : بحب مصر جدا بس مصر بتحب واحد تانى ( يعنى حب من طرف تالت )
والإمتحان ده نزل فى مدرسة : يبقى إنتا أكيد أكيد أكيد يعنى وربنا أكيد والنعمة أكيد فى مصر
مصر كلها توجهت للمدرسة علشان تحل الإمتحان .. ولان المادة كانت مادة مستوى كله كان رايح ومش خايف
ينجح يسقط مش مهم .. المهم .. كل المصريين دخلوا والغريبة كلهم حلوا الإمتحان لأن مفيش ولا سؤال صعب والإمتحان كان من حياتهم اليومية
بس الغريب بجد بقى إن كله قبل مايمشى خاف وقطع ورقته
إيه سر الإمتحان ده .. تعالوا نشوف وإللى يقدر يحل ميحرمناش من إجابته
وأنا إللى هعلم الورق .. وإللى هينجح هنحجزله جناح فى سجن أبو غريب أو جوانتنامو
بسم الله الرحمن الرحيم نبدأ الإمتحان
السؤال الأول: التعبير

اكتب ما لايقل عن 650 سطر فى أحد الموضوعات التالية

لم يجد الطفل غير الشارع ملجأ نظرا لحالة البلد الهباب..فاتجه إلى السرقة والقتل والحشيش.. حتى نال جزاءه وقبض عليه متلبسا بباكتة بانجو.. اكتب قصته مع تسليم الحِرز للباشا مراقب اللجنة

شهدت بلدنا الحبيبة نهضة فى مجال التشييد والبناء وخصوصا بعد وصول سعر الحديد إلى 7500 جنيه للطن.. اكتب ما يمليه عليك ضميرك على أن يبدأ موضوعك بعبارة أنا باشتغل فى حديد عز

بعد انتشار ظاهرة أكل لحم الكلاب والحمير..من وجهة نظرك كحمار تكلم عن هذه الظاهرة ومن المتسبب فيها بدون غلط..الورق متراقب
ــــــــــــــــــــــــــــــــــــــــــــــــــ ـــــــ
السؤال الثانى: القصة

من قصة " وعهد الله ما انت داخل الانتخابات" .. اقرأ القطعة وأجب عن الآتى:

(ثم أتى إليه وضربه بالجزمة وقال: انت عايز تترشح فى الانتخابات يامعفن؟؟ دانت عايز معجزة..مش كفاية بتاكلوا لحمة ومستورين.. عايزين إيه تانى؟)

الأسئلة:

1-ما هى اللحمة؟ أو على الأقل حدد أقرب معنى خيالى لها
2-مرادف معجزة فى اللغة ( تغيير وزارى – زيادة المرتبات – رغيف العيش) اختر يا مقلول البخت
3-لماذ ضربه الرجل بالجزمة وليس بالعصى مثلا؟؟
(أهو كسل .. لسة هيرفع العصاية؟ - عشان العصاية قلة قيمة برضه واحنا فى عصر الديمقراطية – عشان العصاية شغالة بس مش فى الضرب.. افهم انت بقى) اختر
4-حلل بمزيد من التفصيل جملة ضربه بالجزمة ومدى توافقها مع جملة مصر بتتقدم بينا
ــــــــــــــــــــــــــــــــــــــــــــــــــ ــــــــــ
السؤال الثالث القراءة

من موضوع ( الزعيم..والفنان.. والقدوة) اقرأ القطعة وأجب

(وقد نفى الزعيم عادل إمام الإشاعات التى أكدت أنه مرشح لوزارة الثقافة.. وأكد أنه فنان فقط وليس سياسيا الخبر حقيقى كما أنه يرحب بالتوريث ومقتنع بكل سياسات الحكومة)
1-دخل كاتب هذه السطور مسرحية بودى جارد للزعيم رغم قرفه منه أساسا.. فى رأيك ما السبب فى دخوله؟
(أكيد معزوم – طبيعى معزوم – وربنا معزوم).. اختر على أن تضع إيدك على المصحف وانت بتحلف للمراقب بتاع اللجنة
ــــــــــــــــــــــــــــــــــــــــــــــــــ ــــــــــــ
السؤال الرابع النصوص

أجب عن أحد النصين الآتيين

من نص ( ماشربتش من نيلها)..اقرأ ثم أجب

(ماشربتش من نيلها.. جربت تغنى لها.. جربت فى عز ماتحزن تمشى ف شوارعها وتشكى لها)

1-بعد رغبة صاحبة النص فى أن تلد ابنتها فى أمريكا لتحصل على الجنسية الأمريكية..اختر..ما المقصود بنيلها فى النص؟
(المسيسبى - الأمازون – يونج يانج)
2-هذا النص من نصوص الحزب الوطنى والدليل وجود اسم مهم من قيادات الحزب فى النص.استخرج الاسم..وبوسه من بُقـُّه ورجَّعُه مكانه
3-أكمل الأبيات إلى آخر كحكة فى الكليب
4-قوبل النص بانتقادات بسبب بعده عن الواقع..وضح من النص ما يتفق مع القول المأثور اطبخى ياجارية .. كلف يا سيدى
ــــــــــــــــــــــــــــــــــــــــــــــــــ ـــــــ
من نص (حين ميسرة)..أجب عن الآتى

1-اذكر اسم مصيبة واحدة محصلتش فى النص الأسود ده
2-وضح عبقرية أحمد بدير الإرهابى فى النص وهو يكتب رسالة على الكمبيوتر باستخدام أزرار الأرقام فقط ومفيش حروف.. ويعطى أمر التنفيذ بزرار قايمة ستارت مش بإنتر.كمبيوتر إرهابى بقى
3-فى نصى ويجا وخيانة مشروعة وضح خالد يوسف هستيريا الجنس فى الطبقات الغنية.. وفى نص حين ميسرة وضح خالد يوسف هستيريا الجنس فى الطبقات الفقيرة..عشان خطرى.أبوس إيدك .إذكر مع كامل البيانات أماكن هذه الهيستيريا فى المنصورة
إذكر سبب وجود الشرطة كل خمس دقايق فى النص

(موسم ترقيات عقبال أملتك ولازم شغل – أخو خالد يوسف ظابط ولازم يخدم أخوه – عشان الشرطة بتراقب قسم البوليس اللى جنب أحداث النص) اختر

ــــــــــــــــــــــــــــــــــــــــــــــــــ ـــــــــ
السؤال الخامس النحو

أعرب ما تحته خط.. لو مالقيتش القطعة أصلا ..اتصرف
ذهب الرئيس إلى المؤتمر .. ضع الجملة السابقة فى صيغة المثنى.. ماعدا الرئيس طبعا يابني آدم
كان ممدوح إسماعيل قاتلا .. ضع إن مكان كان.. على ألا تنصب ممدوح.. عشان هوه بينصب لوحده
فُرِضت الضرائب علينا ببشاعة ..أعرب الجملة .. وارفع الضرائب أبوس إيدك
ــــــــــــــــــــــــــــــــــــــــــــــ
السؤال السادس الخط

كوز المحبة انخرم..طرطش على كمى..ياحبيبى بطل جفا وارحم عذاب امى
اكتب الجملة السابقة ثلاث مرات بثلاث خطوط.. موبينيل وفودافون واتصالات..كما يمكن التحويل من خط لخط بنفس الرقم.. فقط اتصل بخدمة العملاء

هذا الإمتحان مجرد رؤية ساخرة ولكن الحقيقة ليس بالمرة كهذه إنما أفضل نسبيا

مع تمنايتنا لكم بالتوفيق ..وإعتقال سعيد
إدارة المعتقل
ومش هقول إن إسمى محمد الجميل .. علشان أنا بخاااااف ومليش دعوة .. ومن أول ألم هعترف بكل حاجة